Дашкольная гігіена.

          Дашкольная гігіена як навука вывучае ўплыў чыннікаў вонкавага асяроддзя на развіццё і стан здароўя дзяцей ранняга і дашкольнага ўзросту. Улічваючы ўзроставыя асаблівасці, дашкольная гігіена распрацоўвае дзеянні, накіраваныя на ўмацаванне здароўя дзяцей, іх гарманічнае развіццё і правільнае выхаванне ў дашкольнай установе. Паспяховае правядзенне ўсёй выхаваўчай работы спрыяе нармальнаму фізічнаму і псіхічнаму развіццю дзіцяці, паляпшае здароўе дзяцей. 
          У дашкольнай гігіене любы фактар асяроддзя ацэньваецца паводле таго, як уплывае ён на працэсы развіцця і на стан здароўя дзяцей, бо здароўе, працаздольнасць і працягласць жыцця дарослага чалавека ў вялікай ступені перадвызначаецца яго здароўем у дзяцінстве. 
          З гігіенічным выхаваннем дзіця таксама звязана ахова яго здароўя. Калі бацькі сочаць за тым, каб дзеці перад ежай і пасля наведвання прыбіральні мылі рукі з мылам, глядзелі за сваім адзеннем, былі прычасаныя, чысцілі зубы – гэта своеасаблівая прафілактыка захворванняў. 
          Гігіенічнае выхаванне рыхтуе дзіця да працоўнай дзейнасці: прыбіраючы пасцель, цацкі, свой стол, дзеці набываюць працоўныя ўменні. У першыя 2–3 гады жыцця малога можна прывучаць да таго, каб ён ахайна еў, ахвотна умываўся, умеў карыстацца насоўкаю, прыбіраў на месца свае цацкі. 
          Для таго, каб гігіенічныя ўменні замацаваліся і сталі трывалымі, неабходна, каб і ў сям’і, і ў садзе да дзіцяці выстаўляліся адзіныя патрабаванні. Калі дзіця, якога прывучылі чысціць зубы перад сном, будзе гэта рабіць з нагадвання старэйшых кожны вечар, паступова складзецца звычка, і на далей яму не трэба будзе нагадваць. Дрэнна, калі ў сям’і дарослыя па-рознаму ўплываюць на дзіця. Напрыклад, калі мама прывучае яго да парадку, а бабуля, шкадуючы яго, дазваляе не выконваць тых або іншых патрабаванняў; вядома, у такой сітуацыі ніякія ўменні і звычкі асабістай гігіены ў дзіцяці не сфармуюцца. 
          Шмат якія ўменні асабістай гігіены шчыльна звязаны з аховай здароўя дзіцяці: 
 

• есці толькі мытую садавіну і гародніну;
• не есці ежы, якая звалілася на падлогу;
• рабіць ранішнюю гімнастыку;
• мыць рукі перад ядзеннем
• утрымліваць цела ў чысціні;
• стрыгчы пазногці;
• мыць ногі перад сном;
• карыстацца насоўкаю і інш.

                                                             
          Такім чынам, выхаванне гігіенічных уменняў папярэджвае вельмі многія захворванні дзяцей. Але самая эфектыўная прафілактыка здароўя дзіцяці – гэта сістэматычнае выкананне фізічных практыкаванняў.